ప్రేమారాధన

ప్రేమారాధన 

ఓ నల్లనివాడా!

నా పవిత్ర  నయనధారలతో -అత్యంత  ప్రియమార 

నీ కభిషేక మొనర్చనా!

నా హృదయాంతరాలలోని భక్తి భావ గంధాన్ని -నీ మైపూత చేసి 

నిను స్వాంతన పరచనా !

నా భావకుసుమాలు మాలికలల్లి -ప్రేమమీర 

నీ కంఠసీమను అలంకరించనా!

నాకనుదోయి కాంతులనే -నీ ఆరాధనా 

జ్యోతులుగా వెలిగించనా !

నా మధుర గానామృతాన్ని - నివేదనగా చేసి 

ముద్దారా నీ నోటికందించనా!

నీ నామస్మరణలో నే లీనమై - తనివితీరా 

నీ వీనులనలరించనా!

నీ మ్రోల కైమోడ్చి నా నమస్సుమాలను - 

నీ పాదపద్మముల కర్పించి నిను అర్చించనా!

నీ కరుణా కటాక్ష వీక్షణాల - నిరీక్షణలోనే 

నిరంతరం నే తరించనా!

*******