అల్లరి పిల్ల......!

గెంతుతు నా చెంతకు వచ్చిన అల్లరి పిల్లను చూచితిరా
మీరల్లరి పిల్లను చూచితిరా
నాపై అలకను పూని ఏ వల్లరి మాటున దాగున్నదో....

తెల్లని బొండు మల్లెలతో - విరిసీ విరియని జాజులతో
ఎర్రని ముద్ద మందారంతో - ఝుము ఝుమ్మనె తుమ్మెద నాదంతో
పచ్చని పావడ రెపరెపతో - పల్లెకు తెచ్చే అందాలే

బంగరు రంగు పైరులతో - జలజల పారే ఏరులతో
చల్లని పిల్ల తెమ్మెరతో - కుహుకుహు కోకిల గానంతో
ఘలుఘల్లనె కాలి అందెలతో -పల్లెకు తెచ్చే కళకళలే

భానుని లేత కిరణంతో - నులివెచ్చని సాయం సంధ్యతో

 పున్నమి వెన్నెల రాతిరితో  - మిలమిలలాడే మిణుగురుతో
గలగల చేతి గాజులతో - పల్లెకు తెచ్చే మిలమిలలే

అల్లన మెల్లన వస్తోంది - నవవధువల్లే నడిచింది
అందాన్నెంతో తెచ్చింది - ఆనందాన్ని ఇస్తోంది
విరితావులనే తాకింది - విరిసీ విరియక  నవ్వింది
ఆ కోల కన్నుల భావాలు -  కొలవగ నెవరికి సాధ్యము .

***********