ఇంక ఈ వయసులో వారు.............

ఇంక ఈ వయసులో వారు
ఇక దేనికి ఎదురు చూస్తారు ?

వారి వంక చూసి ఎవరైనా
చిన్న చిరునవ్వు నవ్వక పోతారా అని....

వారి చేతి మీద చేయి వేసి
ప్రేమగా స్పర్శించక పోతారా అని.....

పనులు చేసుకుంటూ వారి ముందు నుండి వెళ్ళినప్పుడు
ఓ క్షణం వారి చూపులో చూపు కలుపక పోతారా అని.....

ఇంటికి వచ్చిన వారెవరైనా
తమను చూసి పలుకరించక పోతారా అని.....

మనవళ్ళు,మనుమరాళ్ళు ఆప్యాయంగా
తమ దగ్గర కూర్చోక పోతారా అని.....

కుటుంబంలో ఏ ఒక్కరైనా తమ కోసం
కొన్ని నిముషాలైనా కేటాయించక పోతారా అని.....

తమ చిన్ననాటి ముచ్చట్లు అడిగి
తమతో ముచ్చటించక పోతారా అని.....

తమ జీవితానుభవాలను తెలుసుకుని
తమ భావి జీవితాన్నిమలచుకోక పోతారా అని.....

ఏదైనా సమస్యలో ఉన్నప్పుడు
పరిష్కారం తమను అడుగక పోతారా అని.....

తమ పిల్లల మీద ప్రేమతో
తాము ఆ ఇంట్లో ఓ వస్తువులా మారిపోయామని గుర్తించలేక ,
తమ అనుభవాలు వారికి పనికిరానివని వారనుకుంటున్నారని తెలుసుకోలేక ,
తమతో మాట్లాడే సమయం పిల్లలు పోటీపరీక్షకు
చదివే సమయాన్ని తగ్గించేస్తుందన్న వారి భావనను అర్ధం చేసుకోలేక .....

పిల్లల్లంతా ఈ రోజు తమ పనుల్లో మునిగిపోయారు
రేపు మాట్లాడించక పోతారా అనే
రేపటి మీద ఆశతో జీవిస్తున్న వారెందరో..... 

***********