నీకు తెలుసా ....... ?

తరంగాలవలె నాలో చెలరేగుతున్న అలజడిని 

నీకు తెలియజేయాలని ,

తీరం చేరే కెరటంలా చాచిన నీ చేతుల్లో 

వాలిపోవాలని ,

చల్లని వెన్నెల్లో మెత్తని నీ ఒడిలో చేరి

 అల్లరి చేయాలని ,

సదా సుమధుర చిరు దరహాసాలతో అలరారే 

నీ ముఖారవిందాన్ని నా దోయిలిలో తీసుకుని 

తదేకంగా చూస్తూ ఉండాలని ,

నాతో ప్రియ సంభాషణ చేసి , నన్ను ముద్దాడే 

ఆ పెదవుల్ని తనివితీరా ముద్దాడాలని ,

తటిల్లతలా నిన్నల్లుకుపోవాలని ,

గువ్వలా నీ గుండె గుసగుసలు వింటూ 

ఆదమరచి నిదుర పోవాలని ,

అక్కున చేర్చుకుని ప్రేమతో నన్ను బంధించగా 

నీ వశమైపోవాలని ,

ఒంటరితనాన్ని వీడి నీ బాహుబంధంలో 

బందీనై కరిగిపోవాలని ,

నీ గుండెలపై కొడుతూ , నా ముఖాన్నిసేదతీరా 

 రుద్దుకుంటూ  నీతో ప్రణయ కలహానికి తలపడాలని ,

నీ హృదయ స్పందనను నేనే అవ్వాలని ,

నా గుండె చప్పుళ్ళు నీ గుండెకు చేర్చాలని ,

నీ ఊహతో నా మేను పులకరించాలని ,

నీ సాహచర్యంలో రేయింబగళ్ళు మరచిపోవాలని ,

నీ హృదయాంతరాళలో నాకే ప్రీతి పాత్రమైన 

స్థానము  ఉండాలని  ,

నీ మృదువైన గుసగుసలు నా చెవిలో 

మారుమ్రోగుతుండాలని ,

మధురమైన నీ పాటను వింటూ 

మైమరచిపోవాలని ,

నా పెదవులు ఎల్లవేళలా నిన్నే పలవరించాలని ,

నాతో కలహించే నీ పెదవుల్ని నా పెదవులతో 

మూసివేయాలని ,

నా దుడుకు , దురుసు అల్లర్లు

 నీ గడసరితనంతో ఓడిపోవాలని ,

నా మెడ వంపులో నీ ముఖం దాచేయాలని ,

నా బాహువల్లరిని మనసారా నీ మెడలోవేయాలని ,

నీ రాకతో నా జీవితవనం ఎల్లప్పుడూ 

వసంతకాలంలా విరాజిల్లుతుండాలని ,

నీ కొనగోటితో నా హృదయవీణను

మీటించుకోవాలని ,

నీ ముసిముసి నవ్వులు చూస్తూ నేను 

జీవితాంతం మురిసి పోతుండాలని ,

నీ చేత్తో నా ముంగురులను సవరించుకోవాలని ,

ప్రేమగా తలపై నిమిరించుకోవాలని ,

నీ ఎద లోయలో హాయిగా ,ప్రశాంతంగా 

నిదురిస్తూ ,నీవు ప్రియాతిప్రియంగా 

ముద్దిడుతుండగా , నీ బాహుబంధం లోనే 

నా తుది శ్వాస విడవాలని ఉంది . 

*******
  
  ( ఉత్తరం -----ఓ మధుర జ్ఞాపకం  )